السلام عليكم ورحمة الله وبركاته انا جاية احكي حكايتي انا بنت زي اي بنت بتحلم بالفستان الابيض والفارس اللي ع حصان والبيت والعيال احلامي بسيطة يعني بس مع الاسف ربنا كان ليه حكمة اني ده ميحصلش والحمد لله انا راضية جدا بتدابير ربنا اشتغلت مدرسة ف البيت ع قدي يعني كنت كل ما اشوف طفل اتعلق بيه واحبه واحس انه ابني وكنت بزعل اوي لما يمشي من الدرس واقعد اعيط ايام كتير واتعلق تاني وتالت لغاية ما فكرت هفضل لغاية امتي اتعلق كدة بطفل مش بتاعي انا عاوزة طفل ليا انا بتاعي محدش ياخده مني كنت حاسة اني حياتي فارغة مفيش هدف فيها مكنتش حياة اساسا كانت لون واحد لغاية ما فكرت اني اروح الملجأ واكفل طفل بس كنت عارفة انه مينفعش عشان انا مش متجوزة فكرت اكفله في مكانه واروح ازوره المهم يبقي بتاعي نفسي اسمع كلمة ماما نفسي ابقي ام زي كل البنات نفسي ارضع واغير وأربي وأكبر وقبل ما اروح الملجأ قريت بوست لشيماء مامت مهند انها كفلت ابنها وهي مطلقة كانت طوق النجاة اللي كنت بدور عليه دخلت سألتها وهي بصراحة جاوبت وفتحت ليا باب الحياة بعد ما كان مقفول في ساعتها قررت وصممت علي تنفيذ حلمي اني ابقي ام تواصلت مع يمني دحروج اللي فتحت قدامي السكة اني اعرف وافهم كل حاجة عن الكفالة وطبعا قلت ابلغ اهلي بقي بقراري لاقيت حرب قايمة ورفض قاطع ازاي وليه ومينفعش وانتي بنت في مجتمع ريفي هيرفضوا بس انا صممت وحلمت ازاي عاوزين يقتلوا حلمي انا حلمت بيها ببنتي اللي قررت اسميها فاطمة علي اسم مامتي الله يرحمها وياريت الرفض كان من الاهل بس حتي الشئون نفسها كانت رفضاني ويوم البحث كان اسوأ يوم في حياتي لما حاسيت اني هترفض كنت هموت والله كنت هموت حاسيت اني احلامي راحت حلم ان فاطمة جمبي كنت بحلم بيها بتعيط وبتضحك وبتلعب وانا اصلا مشفتهاش حلمت بيها في كل مكان في البيت في الشارع وانا نايمة كنت اقوم مفزوعة من النوم عشان سمعتها بتعيط ابص جمبي ملقيش حد وجه يوم البحث كسر كل احلامي وقلت خلاص مفيش امل عارفين الملاك اللي بيجي ينتشلك من الضياع كانت رشا مكي دي ملاكي اللي جه وطبطب علي قلبي مكنتش اعرفها دخلت كتبت ع جروب الكفالة وهي شافت البوست بعتتلي كلمة واحدة حاسيت انها اختي او امي حاسيت انها من دمي لما قالت لي انا شفت البوست بتاعك انا اتقهرتلك الكلمة لمست قلبي حد يزعل عشانك وانت متعرفوش حد يساعدك من غير ما تطلب كانت هي ربنا يجزيها خير ساعدتني جدا جدا والحمد لله جت الموافقة يااااااااااااااه كنت حاسة اني طايرة ف السما وانا رايحة اشوف فاطمة حلم حياتي هيتحقق مختارتهاش والله كانت اكبر حد هناك مكنتش عارفة مشاعر متلغبطة حاسيت بالخوف اول ما شلتها هل اقدر اربيها واخليها احسن بنت ولا اظلمها معايا قعدت اتكلم معاها وهي بتضحكلي وانا مش عارفة اقرر هي بنتي ولا لا ولسه هقول لا لاقيتها باستني بجد باستني كانها بتقولي متسبنيش واللي كان معايا قالي هي دي بنتك دي باستك وهي متعرفكيش قلت ماشي وسبتها وطلعت لاقيتها بتنده عليا بتقول ماما رجعتلها كنت عاوزة افتح قلبي واخبيها جواه هي دي بنتي هي دي فاطمة هي دي اللي هتدخلني الجنة و النهاردة بعد خمس شهور وهي معايا احلي خمس شهور ف حياتي عشتهم معاها وليها بقي ليا بنت بتقول ماما بتحضني لما بعيط كفاية اوي حضنها بالدنيا وما فيها احلي حضن في الدنيا لونت حياتي بطعم الفرح والسعادة بخاف عليها من الهوا الطاير بنت قلبي بقي لازم احبها ربنا يبارك لي فيها ويحفظها ليا وربنا يقويني واخليها احسن بنت ف العالم

‍"رغم إن بعض المسئولين في الشئون قالوا رجعيها واختارى غيرها لكن رفضت لأن ربنا بعتهالي في المنام لأنها أكيد كانت محتجالي ولو رجعت بيا الأيام برضه هختار رحمة". أنا حنان من سوهاج، متجوزة من ٢٢ سنة، وفكرت في الكفالة بعد خمس سنين من الجواز وفاتحت جوزي كتير في الموضوع لكن كل مرة كان بيرفض. لما والدى الله يرحمه توفى حسيت بالوحدة رغم إن أمي وأخواتي موجودين وحسيت إني هبقى وحيدة العمر كله وخفت من كبر السن وخفت إني أموت ومحدش يكون معايا، ففتحت موضوع الكفالة تاني مع جوزي لكنه برضه رفض لكن المرة دي أنا صممت وقولتله الكفالة أو الطلاق، فوافق بعد عذاب.‍مكدبتش خبر وتاني يوم روحت للدار واخترت رحمة، في الحقيقه ربنا هو اللي اختارها لي لأن اليوم اللي قبلها شوفتها في المنام، واستلمت رحمة خلال أسبوع، وكانت أسرع إجراءات اتعملت سبحان الله وكان أجمل يوم في حياتي.‍ولما قالت ماما حسيت بفرحة وسعادة مش طبيعية وكنت بتنطط زي الأطفال، وكل يوم كانت بتكبر قدام عيني بفرح بيها وبيزيد الحب بيننا.‍واكتشفت بعد فترة بسيطة إن بنتي من ذوي الاحتياجات الخاصة، حمدت ربنا على نعمته ومجاش في بالي لحظة اتخلى عنها رغم إن بعض المسئولين في الشئون قالوا رجعيها واختاري غيرها لكني رفضت لأن ربنا بعتهالي في المنام لأنها أكيد كانت محتجالي ولو رجعت بيا الأيام برضه هختار رحمة.‍وبعد ١٠ سنين قررت أكفل تاني والحمد لله قدمت وبعد طول الإجراءات استلمت مريم وكان نفس الاشتياق اللي حسيته يوم ما استلمت رحمة، ورحمة كانت فرحانة بمريم جدًا وجهزت لها كل حاجة من لبس وأكل وعرايس وحلويات ربنا يبارك فيهم وكنت فرحانة بيهم خالص وأنا مروحة بيهم وحسيت إن عيلتي كبرت ما شاء الله مع العلم إن رحمة هي اللي اختارت مريم وبحمد ربنا إنه أكرمني ببناتي وبالكفالة وأكون في مجاورة سيدنا محمد صلى الله عليه وسلم بإذن الله في الجنة.‍

"في ناس قالتلي إنتي كده مش كافلة يتيم لأنها كريمة النسب، وفي اللي قالي دي هتطلع زي أهلها، بس أنا عارفة أنه لا تزر وازرة وزر أخرى، وأنها أحسن بنت في الدنيا بالتربية اللي بنربيها".أنا اسمي راحيل، زوجة وأم لأربع أطفال منهم بنتي بالكفالة.فكرة الكفالة فضلت ملازماني فترة طويلة، حتى بعد ما تزوجت وأنجبت ولدين وبنت، اللي كانت مع كل حضن منها كنت بفتكر أن في آلاف البنات في الدور مش لاقين الحضن والدفا، كان قلبي بيوجعني وأرجع أفكر في الكفالة، بس ولا حد وافق على الفكرة وفضلوا يقولولي إنتي ناقصة عندك ٣ أولاد.‍أنا بنت وحيدة وكنت خايفة بنتي تبقى وحيدة زي علشان كده قررت أكفل أختها، وقفلت وداني علشان مسمعش كلام حد ولا أرجع في قراري، ساعتها لقيت موقع يلا كفالة وتواصلت معاهم كنت فاكرة إن الشروط بتمنع إني أكفل علشان عندي ٣ أطفال بس رشا مكي قالتي أن الشروط دي اتغيرت وفضلت معايا وبقت سند ليا لحد ما لقيت بنتي.‍لما بدأت أحضر الورق وأمشي في الإجراءات حسيت إن ربنا بيحبني، لأنها كانت أسرع حالة كفالة في خلال أقل من شهرين من تقديم الورق كانت بنتي في حضني، ولأني بحب زوجي جدًا وبحب اللي يحبه حبيت حور واخترتها لأنها جريت عليه وحضنته وفضلت في حضنه، قلت يبقي هي اختارت باباها وقد كان.‍مش قادرة أوصف سعادتي لما استلمت شهادة الميلاد، دخلت حور بيتنا وكملته بشقاوتها ولعبها، بقت أخت جميلة لولادي ومفيش فرق ما بينها وبينهم، كلهم بيحبوها.‍هي لسة صغيرة على أنها تعرف الحقيقة بس هبدأ أحكي لها قصص من وهي صغيرة وبعد كده لازم أخليها تواجه العالم كله بشجاعة ومن غير كسوف.‍أنا نفسي الناس تبطل تحكم على ولادنا، والنظرة السلبية تتغير والناس تكفل الأطفال في بيوتها، علشان الأطفال مكانها البيت و الرسول قال أنا وكافل اليتيم كهاتين في الجنة.‍